ساری طوطی اوتوبوسون شیشه‌سیندن آسیلیب گونشین ایشیغی اونو داها چوخ پاریلتیلی گؤستریر. اما حئیفلر اولسون کی باغلیدی. بو اتوبوس اونا قفس کیمیدی. اوتوبوس سوروجوسو اونون گؤزللیگینی گؤرمور. تک اونون گوزللیگینی یوخ، دونیانی قارا گؤرور او قارا گؤزلوگویله

اوتوبوسدا گئتدیکجه آدام چوخالیر اوچ اوشاق گوله-گوله اوتوبوسا مینیللر آنالاری دا آرخالاریجا، اما آنالاری گولمور

اوچ اوشاق اونلار منیم اؤنومده‌کی صندلده اوتوروللار، آنالاری ایسه آیاق اوسته دایانیر. اوشاقلار سئوینجکدیلر. آنالاری اونلارا بایرام پالتاری آلاجاق

بؤیوک اوشاقین 10 یاشی اولار، آدی جاواددی. جاواد دیقتله منه باخیر اورتانجیلین آدی جلال‌دی. او چوخ دانیشمیر، ساچلاری طوطی رنگددی. بالاجا اوشاغین آدین اؤیره‌نه بیلمه‌دیم. اما مطلق ج نان باشلاییردی آدینین اول حرفی

ج گولر اوزلویدو. دیقتی چوخویدو. اونون قارا گؤزلری پارلاییردی

ج اورتادا اوتوروب، جلال سول طرفده، جاواد ساغدا. جاواد ایاق اوسته دورور اوتوبوسون توزلو شیشه سیندن چوله باخیر. ج آغلاییر، "آنا من جوادین یئرینده اوتورماق ایسته ییرم" دئییر. آناسی جاوادا باخیب دئییر:
- " جاواد قوی قارداشین اوتورسون اوردا".
جاواد اؤزون ائشیدمزدیگه ورور. آناسی بو دفعه جاوادین کاپشنین چکیر:
- " قوی قارداشین اوتورسون اوردا."
جاواد چکیلیر اورتادا اوتورور. ج سئوینیر. جاوادین یئرینده اوتورور. آناسینا باخیب گولومسه‌مکله تشککورون بیلدیریر

اوتوبوسون قاباغیندا ساققاللی اوغلان چالیشیر آیاق‌قابیسی‌نین جیریغین گیزلتسین کی کیمسه گورمه‌سین آیاق‌قابیلاری جیریخدی. اما او بیلمیردی کی کیمسه اونون جیریق باشماقلارین گؤرمور. اوشاقلار بحثه گیریللر. جواد دئییر:
- " بالیغی یاخجالا قویساق اولر."
جلال شیشه دن آسلانان طوطی‌یه باخیر. ج دئییر:
- " قویاریخ ایستی سویا اولمز."
ج بو سؤزو دئیب منه باخیر. مندن یاردیم ایستیر کی بیلسین بالیغین هارا قویسون کی اؤلمه‌سین

آناسی گؤرور کی ج منه باخیر کی من یاردیمچی اولوم. چادراسین قاباغا چکیب دئییر بالیغی نه ایستی سویا قویاللار نه یاخجالا. بالیغی سویوق سویا قویاللار کی اؤلمه‌سین. اوشاقلار آنالارینین سؤزونه راضی اولوللار. ج تپیگین یئره دویرک دئیر:
- "آنا منه قارا بالیق آلاجاقسان."
جواد دئییر:
- "منه قیرمیزی بالیق آلاجاقسان."
جلال، من آغ بالیق ایستیرم دئینده آنالاری داها دانیشماین دئییر

چؤلده گرمیچ اسیر. قوروموش آغاجلارین قولاغینا باهارین گلیشینی سؤیله‌ییر. اوتوبوسدا قوجا بیر قادین اوجادان دانیشیر. اتوبوسون لاپ آرخا طرفینده اوتوروب. اونو گؤره بیلمیرم، ساده‌جه سسین ائشیدیرم. دئییر:
- "کورد اوغلو یئره گیریب، داها یئرده قار قالماز. اونون نفسی بو قاری اریدر."
لاپدان اوشاقلار اوجا سسله گولوشوللر. جاواد باشینداکی پاپاغی اوزونه چکیر. ج اورکدن گولور. الینی الینه وروب دئییر:
- "داداش نه‌یه اوخشاییرسان."جلال دا گولور. اودا آغ پاپاغین اوزونه چکیر، اما بالاجا قارداشی جاوادا گولدویو کیمی اونا گولمور. جلال دا یاواش پاپاغین اوزوندن چکیر. جواد ج‌نین پاپاغین اوزونه چکیر آناسی عصبله‌نیر، جاوادین قولاغین چکیر. جاواد تئز الین آتیر قولاغینا. جاواد قیزاریر، باشینی آشاغی سالیر. اتوبوس سونونجو دایاناجاغا چاتیر. بوردا هامی اتوبوسدان دوشمه‌لیدیر

دونن یولدان کئچنده دریسی آسفالتا سریلمیش، گؤزلری گویه باخا-باخا اؤلن پیشیگی گؤردوم. قارنی جریلمیشدی. بوغارسیقلاری هامارا داغیلمیشدی. قانی خیابانین قارا پالتارینا تؤکولموشدو. خیابان پیشیگین اؤلوسونو تحمول ائدیردی

قارا آسفالتین اوستونده پیشیگین قیرمیزی اتی گوزه دَییردی

یول قیراغیندا اوتوبوس گؤزله‌ین قادینلارین دا فیکرینی جلب ائتمیشدی بوآسفالتا سریلن پیشیک

هر ماشین اوستوندن کئچنده پیشیک یئنیدن اؤلوردو

جمعه گونودور قالديريملار دولودو نماز جمعه دن گلن آداملارلا، اللرينده تسبح ديللرينده صلوات و تانرينين آدی. اونلار اؤزلریندن باشقا

هر کسی سوچلو گوروللر، سوچلو گوزلریله
شهرین هاواسی آغیر گوناهلارین آراسیندا ایلیشیب قالیب. قالديريملارا دوزولن باشماقلار، معصوم باخيشلارييلا بيزه باخان كيتابلار اوزانيبلار قالديریملارا و اوستلرينه تورپاقدان بير اورتوك چكيبلر. بونلاری سئير ائده-ائده اوتوبوس داياناجاغينا ساری گئديرم. گونشين اليندن گيزلنمك اوچون سويود آغاجی‌‌نين گؤلگه‌سينه کئچیرم. آغاجين يارپاقسيز گولوشونو ائشيديرم. بير شئی سؤيله‌ميرم، سوسورام بو یارپاق سیز آغاجین قاباغیندا

نمازدان قایدان قادينلارا باخيرام قارا چادرا باشلاريندا و اللرينده بير نايلون. نايلونون ايچينده آغ گوللو چادرا بيرده جاناماز. اونلار بیر یئره یغیشیب نیسدن دانیشیللار. یادا یولون اوتایندا خیابانین قیراغیندا پالتار ساتان اوغلانین پالتارلارینا باخماغا گئدیللر

هرسی بیر کؤینه‌یی یا شالواری گؤتوروب بیر بیرندن نظر ایستیللر. یا اوغلانلا قیمت اوستونده بحث ائدیللر

ساری بير اتوبوس گلير. قادينلار هجوم چكير اتوبوسا ساری. تلسيكلی هامی مینمه‌یه چالیشیر. منده قادینلارین سیخینتی‌لارینین آراسیندا تئز اوتوبوسا مینیرم. اتوبوس یولا دوشور یئرده قالان قادینلار هله پالتارلارا باخیللار. اوتوبوس‌داکی قادینلار اوجا سسله دانیشیللار. هئچ کیم هئچ کیمین سسین دینله‌میر هامی اؤز سؤزون دئییر.
اوتوبوسون آرخاسيندان بير قادين اوجا سسله دئیير آی خانيم لار بو سجاده كيميندی قادينلارين هاميسی اوتوبوسون آرخاسینداکی قادینین الینده اولان سجادیه سونرا چانتالارينا بعضی سی ده نايلونلارينا باخير. بير قادين تلسيكلی دئيیر: وای منيمدی و سجاده‌سین آلماق اوچون آرخا طرفه گئدیر.
منيم آرخامدا ايله‌شن قادين چادراسين قاباغا چكير بؤيرونده ايله‌شن قادينا ناماز حاقدا دانيشير. سؤزو قوتاراندا آستاجا صلوات دئییر

من اونلارين ايچينده بير غريبه كيمی‌یم. دانيشيقلارا قولاق آسيرام. گئتديكجه قادينلارین تعداديندان آزالير

اونلار اوتوبوس‌دان دوشنده بير بيريندن وداغلاشيب جمعه گونو گؤروشريك ديیه آيريليللار

ایستی بیر هوا قوجاقلایب بیزی. بیز بو هاوادان نفس آلیریق. ساعات 11:30 تاکسیده یم تاکسینین مسافیرلری سوسقوندولار. تاکسیچی کئچل بیر کیشیدی واختی آز گتیردیگینه گیلئیلیدی. ائله هی ماشین سوره-سوره دانیشیر، گاهدا آلنینین ترین سیلیرماشین ترافیکه دوشور. ایکی فارس کیشی پئژو ماشینین ایچینده. تاکسیچیدن آدرس خبر آلیللار تاکسیچی دئییر: دؤر وور قاییت. اونلار دؤر وروللار. تاکسیچی تاکسینین توزلو آیناسینان اونلارین اوزاقلاشماسینا باخیر، توزلو زامانینا دئینیر. آلنینین ترین سیله-سیله دئییر: کوپک اوغلانلری وظلری یاخشیدی، گلیب هر یئری گزیللر بیز ایسه ائله بو تاکسیله شهرده آوارا، ایلده چتین بیر دفعه سرعینه گئدیریک. ائله بیلیریک هامی بیزیم کیمیدی.
قاباخ صندلیده ایله شن آلچاخ بویلو کیشی هئچ دانیشمیر سادجه قاباغا باخیر. آرخا صندلده ایله شن ایکی کیشینین ده سسی اوجالیر بیرینین الینده گیلاس وار، قیپ قیرمیزی ائله بیل دونیانین قیرمیزی بویالارین اوغورلایب ییغیب الینده کی نایلونا. او بیریسی الینه کوتون گوتوروب قاپ قارا قارا گوزلری کیمی
الینده گیلاس اولان دئییر هه واللاه یامان زامان اولوب

قاباخدا ایله شن کیشی دوشور. تاکسیچی دالسیجا باخیر. اونو قدیم قورو بَیلره اوخشادیر دئییر: ظالیم اوغلونون هئچ بوینودا دونمور، دوز یئریییر کیشی اونون سسینی ائشیتمیر یولونو گئدیر قورو بیلر کیمی.
ماشین بیر آز گئدندن سوهرا بیر قادین ایکی اوشاغیلا تاکسییه مینمک ایستیر. بیر قیزی وار بیر اوغلو. قیزینین 10 یاشی اولار. الینده آیی آیسینا باخیر. اوغلو اوشاقدی آناسینین قوجاغیندادی. قادین تاکسیه مینیر تاکسینین قاپیسین باغلایر بیر کیشی باشین اوزادیر تاکسینین آچیق شیشه سیننن دئییر: آی خانیم چادران قالیب قاپینین آراسیندا. قادین هول اولور تئز چادراسین یغیشدیریر. کیفینن یوز تومن چیخاردیر تاکسیچیه وئریر داها دانیشان یوخدو. من تاکسیدن دوشورم. ایستی هاوانی ریه لریمه یغیرام گونش باشیمین اوستونده. تاکسی سورتله گئدیر. او قادینین قیزی یئنده آییسینا باخیر. آییسی بیزلره گولور، بو ایستی هاویا گولور. خیاباندا پلیس یولون اورتاسیندا دایانیب گونشی سایمادان ماشینلاری یولا سالیر گاهدا جریمه یازیر

آرابا تيتره يه-تيتره يه گئدير
بير اوغلان رسيم چكير
بير قيز رسمينی
آراباداكی قيزلارين
های كويونون ايچينده
بير قيز يارانير
سئون بير اوغلانين الينده
باخيرام قيز رسمينه
بنزده بيلميرم بو قيز رسمينی
آراباداكی قيزلارين بيرينه
گوره سن بو قيز كيمدی درين بير خياله داليب

بو جنايت قوخان شهرده
تكجه من سنی دوشونورم
بوز بولانيق رسمينه باخا-باخا
سؤنموش گونشه ساری پنجره نی آچيب
سنسيزليكدن نفس آليرام
هردن دارانميش ساچلاريمدان
اولومون ايزلرينی سيليرم
شئيطانا اويمورام سنی دوشونورم

گئجه قارا پالازین چكير باشيميزا
اودور خياللاريميزی
نفسلريميزی حبس ائدير سينه سينده
تانری قولاق آسدييا گلير قاپيميزا
بو گئجه آماندی ياخشی سوز دانيش
تانری قولاغين ياپيشديريب بيزيم قاپييا